ਤੈਰਾਕੀ ਬੀਚ ਦੀ ਜਾਣਕਾਰੀ
“BEACH CLOSED” (ਬੀਚ ਬੰਦ ਹੈ) ਦੇ ਚਿੰਨ੍ਹਾਂ ਦੇ ਅਰਥ:
- ਤੈਰਨ ਦੇ ਲਈ ਬੀਚ ਬੰਦ ਹੈ।
- ਪਾਣੀ ਵਿੱਚ ਬੈਕਟੀਰਿਆ ਦੇ ਪੱਧਰ ਉੱਚੇ ਹਨ।
- ਤੈਰਨਾ ਮਨ੍ਹਾਂ ਹੈ।
- ਪਾਣੀ ਵਿੱਚ ਨਾ ਜਾਓ।
- ਆਪਣੇ ਬੱਚਿਆਂ ਨੂੰ ਪਾਣੀ ਵਿੱਚ ਨਾ ਜਾਣ ਦਿਓ।
ਬੈਕਟੀਰਿਆ ਦੇ ਉੱਚੇ ਪੱਧਰਾਂ ਦਾ ਮਤਲਬ ਹੈ ਕਿ ਪਾਣੀ ਵਿੱਚ ਕਿਸੇ ਕਿਸਮ ਦਾ ਮਲ-ਮੂਤਰ ਹੈ। ਇਹ ਮਲ-ਮੂਤਰ ਲੋਕਾਂ, ਕੁੱਤਿਆਂ, ਹੰਸਾਂ ਜਾਂ ਦੂਜੇ ਜਾਨਵਰਾਂ ਦਾ ਹੋ ਸਕਦਾ ਹੈ। ਮਲ ਵਿੱਚ ਅਜਿਹੇ ਰੋਗਾਣੂ ਹੋ ਸਕਦੇ ਹਨ ਜਿਨ੍ਹਾਂ ਕਾਰਨ ਲੋਕ ਬਿਮਾਰ ਪੈ ਸਕਦੇ ਹਨ।
ਮਲ-ਮੂਤਰ ਨੂੰ ਪਾਣੀ ਤੋਂ ਬਾਹਰ ਰੱਖੋ।
- ਤੈਰਨ ਲਈ ਬਣੇ ਬੀਚ ਤੇ ਆਪਣੇ ਕੁੱਤੇ ਨੂੰ ਨਾਲ ਨਾ ਲਿਆਓ। ਤੈਰਨ ਲਈ ਬਣੇ ਜ਼ਿਆਦਾਤਰ ਬੀਚਾਂ ‘ਤੇ ਕੁੱਤਿਆਂ ਨੂੰ ਲਿਆਉਣਾ ਮਨ੍ਹਾਂ ਹੁੰਦਾ ਹੈ।
- ਬੱਤਖਾਂ ਅਤੇ ਹੰਸਾਂ ਨੂੰ ਖਾਣ ਲਈ ਕੁਝ ਨਾ ਦਿਓ।
- ਛੋਟੇ ਬੱਚਿਆਂ ਨੂੰ ਤੈਰਨ ਲਈ ਚੰਗੇ ਡਾਇਪਰ ਪਹਿਨਾਓ।
- ਤੈਰਨ ਤੋਂ ਪਹਿਲਾਂ ਸ਼ਾਵਰ ਲਓ।
ਕਿਹੜੇ ਬੀਚਾਂ ਤੇ ਪਾਣੀ ਦੀ ਜਾਂਚ ਹੁੰਦੀ ਹੈ?
ਕਿੰਗ ਕਾਉਂਟੀ ਬਹੁਤ ਸਾਰੇ ਬੀਚਾਂ ਤੇ ਪਾਣੀ ਦੀ ਜਾਂਚ ਕਰਦੀ ਹੈ। kingcounty.gov/swimbeach ਵਿਖੇ ਇੱਕ ਨਕਸ਼ਾ ਮੌਜੂਦ ਹੈ। ਗਰਮੀਆਂ ਵਿੱਚ ਅਸੀਂ ਹਰ ਹਫ਼ਤੇ, ਆਮ ਤੌਰ ਤੇ ਸੋਮਵਾਰ ਨੂੰ, ਪਾਣੀ ਦੀ ਜਾਂਚ ਕਰਦੇ ਹਾਂ।
ਕਿਹੜੇ ਬੀਚ ਬੰਦ ਕੀਤੇ ਜਾਂਦੇ ਹਨ?
ਜਾਂਚ ਦੇ ਦੋ ਦਿਨ ਬਾਅਦ, ਨਤੀਜੇ kingcounty.gov/swimbeach ਵਿਖੇ ਲਗਾ ਦਿੱਤੇ ਜਾਂਦੇ ਹਨ। ਨਕਸ਼ੇ ਵਿੱਚ ਹਰੇ ਗੋਲਿਆਂ ਵਾਲੇ ਬੀਚ ਖੁੱਲ੍ਹੇ ਬੀਚ ਹਨ ਜਿਨ੍ਹਾਂ ਦੀ ਹਾਲ ਵਿੱਚ ਹੀ ਜਾਂਚ ਕੀਤੀ ਗਈ ਹੈ।
ਲਾਲ ਚੌਕੋਰ ਨਿਸ਼ਾਨ ਵਾਲੇ ਬੀਚ ਬੰਦ ਹਨ।
ਅਜਿਹੀਆਂ ਥਾਂਵਾਂ ਤੇ ਤੈਰਨ ਬਾਰੇ ਤੁਹਾਡਾ ਕੀ ਖਿਆਲ ਹੈ ਜਿਨ੍ਹਾਂ ਦੀ ਜਾਂਚ ਨਹੀਂ ਕੀਤੀ ਗਈ ਹੈ?
ਅਸੀਂ ਸਿਰਫ ਥੋੜ੍ਹੇ ਜਿਹੇ ਅਜਿਹੇ ਤੈਰਨ ਵਾਲੇ ਬੀਚਾਂ ਦੀ ਜਾਂਚ ਕਰ ਪਾਂਦੇ ਹਾਂ ਜੋ ਲੋਕਾਂ ਨੂੰ ਸਭ ਤੋਂ ਵੱਧ ਪਸੰਦ ਹਨ। ਜਿਹੜੇ ਬੀਚਾਂ, ਝੀਲਾਂ ਜਾਂ ਜਲ-ਪ੍ਰਵਾਹਾਂ ਦੇ ਪਾਣੀ ਦੀ ਜਾਂਚ ਨਹੀਂ ਹੋਈ ਹੈ, ਉਹਨਾਂ ‘ਤੇ:
- ਸਾਵਧਾਨੀ ਵਰਤੋ ਜੇ ਤੁਹਾਨੂੰ ਪਾਣੀ ਵਿੱਚ ਕਾਈ ਤੇ ਫੁਲ ਖਿੜੇ ਹੋਏ ਨਜ਼ਰ ਆਉਂਦੇ ਹਨ। ਕਾਈ ਦੇ ਕੁਝ ਫੁਲ ਜ਼ਹਿਰ ਪੈਦਾ ਕਰ ਸਕਦੇ ਹਨ। www.nwtoxicalgae.org ਵਿਖੇ ਕਾਈ ਬਾਰੇ ਜਾਣਕਾਰੀ ਪ੍ਰਾਪਤ ਕਰੋ ਅਤੇ ਜ਼ਹਿਰ ਦੀ ਜਾਂਚ ਦੇ ਨਤੀਜੇ ਦੇਖੋ।
- ਸਾਵਧਾਨੀ ਵਰਤੋ ਜੇ ਤੁਹਾਨੂੰ ਪਾਣੀ ਦੇ ਕਿਨਾਰੇ ਮਲ-ਮੂਤਰ ਨਜ਼ਰ ਆਉਂਦਾ ਹੈ ਜਾਂ ਉਸਦੀ ਬਦਬੂ ਆਉਂਦੀ ਹੈ। ਇਸ ਦਾ ਮਤਲਬ ਹੈ ਕਿ ਪਾਣੀ ਵਿੱਚ ਲੋਕਾਂ, ਪਾਲਤੂ ਜਾਨਵਰਾਂ ਜਾਂ ਜੰਗਲੀ ਜਾਨਵਰਾਂ ਦਾ ਮਲ-ਮੂਤਰ ਹੈ।
ਹੋਰ ਉਪਯੋਗੀ ਜਾਣਕਾਰੀ:
- ਤੈਰਨ ਵੇਲੇ ਸੁਰੱਖਿਆ ਸਬੰਧੀ ਮਸ਼ਵਰਿਆਂ ਲਈ ਅਤੇ ਘੱਟ ਖਰਚੇ ਵਾਲੀਆਂ ਜਾਂ ਕਿਰਾਏ ਦੇ ਮਿਲਣ ਵਾਲੀਆਂ ਲਾਈਫ ਜੈਕਟਾਂ ਦਾ ਪਤਾ ਲਾਉਣ ਲਈ ਕਿੰਗ ਕਾਉਂਟੀ ਦੀ ਸੁਰੱਖਿਆ ਵੈਬਸਾਈਟ ਤੇ ਜਾਓ।
- Puget Sound ਵਿਖੇ ਸਮੁੰਦਰੀ ਬੀਚਾਂ ਦੀ ਜਾਂਚ ਵਾਸ਼ਿੰਗਟਨ ਸਟੇਟ ਦੇ ਵਾਤਾਵਰਨ ਵਿਭਾਗ ਵੱਲੋਂ ਕੀਤੀ ਜਾਂਦੀ ਹੈ।
- ਕਿੰਗ ਕਾਉਂਟੀ ਹਰ ਮਹੀਨੇ ਕਈ ਜਲ-ਧਾਰਾਵਾਂ ਵਿਚਲੇ ਬੈਕਟੀਰਿਆ ਦੀ ਜਾਂਚ ਵੀ ਕਰਦੀ ਹੈ। ਟੈਸਟਾਂ ਦੇ ਨਤੀਜੇ Streams Monitoring ਦੀ ਵੈਬਸਾਈਟ ਤੇ ਮੌਜੂਦ ਹਨ।
- ਸੀਐਟਲ ਦੀਆਂ ਕੁਝ ਜ਼ਿਆਦਾ ਪੁਰਾਣੀਆਂ ਬਸਤੀਆਂ ਵਿੱਚ ਜ਼ਮੀਨ ਦੇ ਹੇਠਾਂ ਗੰਦੇ ਪਾਣੀ ਦੇ ਸੰਯੁਕਤ ਸੀਵਰ ਹਨ ਜੋ ਅਜਿਹੀਆਂ ਪਾਈਪਾਂ ਹਨ ਜੋ ਬਾਰਸ਼ ਦਾ ਪਾਣੀ ਅਤੇ ਗੰਦਾ ਪਾਣੀ ਦੋਨੋਂ ਇਕੱਠੇ ਲਿਜਾਂਦੀਆਂ ਹਨ। ਵੈਬਸਾਈਟ “Combined Sewer Overflow” ਉਹ ਥਾਂਵਾਂ ਦਰਸਾਉਂਦੀ ਹੈ ਜਿਥੇ ਹਾਲ ਵਿੱਚ ਹੀ ਸੰਯੁਕਤ ਸੀਵਰ ‘ਚੋਂ ਗੰਦਾ ਪਾਣੀ ਬਾਹਰ ਨਿਕਲ ਆਇਆ ਸੀ। ਗੰਦੇ ਨਾਲੇ ਦਾ ਪਾਣੀ ਬਾਹਰ ਨਿਕਲਣ ਵਾਲੀ ਥਾਂ ਦੇ ਨੇੜੇ 48 ਘੰਟੇ ਲਈ ਤੈਰਨ ਤੋਂ ਗੁਰੇਜ਼ ਕਰੋ।